शिल्पा र राज कुन्द्राबिरुद्ध ६० करोड ठगीको आरोप

मुम्बई । बलिउड अभिनेत्री शिल्पा शेट्टी र उनका श्रीमान् राज कुन्द्रा फेरि समस्यामा फसेका छन् । उनीहरुको समस्या कम हुने छाँट छैन । 

मुम्बईका एक व्यापारीले उनीहरूमाथि ६० करोड रुपैयाँभन्दा बढीको ठगीको आरोप लगाएका छन् । मुम्बई प्रहरीको आर्थिक अपराध शाखा (इओडब्लु) ले यस विषयमा शिल्पा, राज र अर्का एक व्यक्तिविरुद्ध मुद्दा दर्ता गरेको छ ।

उजुरी अनुसार यो २०१५ देखि २०२३ सम्मको हो । उजुरीकर्ता दीपक कोठारीले शिल्पा र राजले आफ्नो व्यवसाय विस्तार गर्ने नाममा आफूबाट पैसा लिएको तर आफ्नो व्यक्तिगत खर्चमा प्रयोग गरेको आरोप लगाएका छन् ।

यो मुद्दा बाहिर आएपछि बलिउड र व्यापार जगतमा हलचल मच्चिएको छ ।

मुद्दा कसरी सुरु भयो ?

दीपक कोठारीका अनुसार सन् २०१५ मा शिल्पा र राज कुन्द्राले एक बिचौलिया मार्फत उनलाई सम्पर्क गरेका थिए ।

उनी आफ्नो कम्पनी ‘बेस्ट डिल टिभी प्राइभेट लिमिटेड’ को लागि ७५ करोड ऋण लिन चाहन्थे । यो कम्पनीले जीवनशैलीका उत्पादनहरू बेच्थ्यो र अनलाइन किनमेल प्लेटफर्म पनि चलाउँथ्यो । त्यतिबेला ब्याजदर १२ प्रतिशतमा कुरा भएको थियो ।

कोठारीको आरोप छ कि पछि उनीहरू दुवैले उनलाई ऋणको सट्टा ‘लगानी’ को रूपमा पैसा दिन भने । उनीहरूले उनलाई हरेक महिना प्रतिफल पाउने र मूल रकम पनि फिर्ता गरिने आश्वासन दिए ।

कोठारीले भने कि उनले अप्रिल २०१५ मा ३१.९५ करोड र सेप्टेम्बर २०१५ मा २८.५३ करोड कम्पनीको बैंक खातामा जम्मा गरेँ । यसरी कुल ६०.४८ करोड दिइएको थियो ।

लामो समयसम्म आफ्नो पैसा फिर्ता नपाएपछि कोठारीले शिल्पा र राजले जानाजानी आफ्नो पैसाको दुरुपयोग गरेको र व्यक्तिगत फाइदाको लागि खर्च गरेको आरोप लगाए । यसपछि उनले मुम्बई प्रहरीमा उजुरी दर्ता गरे ।

अब इओडब्लुले यो सम्पूर्ण मामिलाको गहन अनुसन्धान गरिरहेको छ, जसमा सबै लेनदेन र सम्झौताहरूको अनुसन्धान भइरहेको छ ।

शिल्पा–राजको स्पष्टीकरण ?

यस विषयमा, शिल्पा शेट्टी र राज कुन्द्राका वकिल प्रशान्त पाटिलले आरोपहरूलाई ‘निराधार र द्वेषपूर्ण’ भन्दै एक विज्ञप्ति जारी गरेका छन् ।

वकिलले यो मुद्दा फौजदारी नभएर पूर्णतया देवानी भएको बताए । उनले यो मुद्दा पहिले नै एनसिएलटी (राष्ट्रिय कम्पनी कानून न्यायाधिकरण) मा सुनुवाइ भइसकेको र त्यहाँ नै मिलाइएको दाबी गरे ।

वकिलले कम्पनीले खारेजी आदेश प्राप्त गरिसकेको र यसका कागजातहरू पनि प्रहरीलाई बुझाइएको पनि बताए । वकिलले यो मुद्दा उनका ग्राहकहरूको छवि बिगार्नको लागि मात्र दायर गरिएको र उनीहरूले यस विरुद्ध कानुनी कारबाही गर्ने बताए ।