एघार जना फरार प्रतिवादी पक्राउ

वीरगञ्ज (पर्सा) । प्रहरीले एघार जना फरार प्रतिवादीलाई मङ्गलबार पक्राउ गरेको छ । 

पर्सा जिल्ला अदालतबाट भएको फैसलाबमोजिम विभिन्न मुद्दामा लगत लागेका ११ जना फरार प्रतिवादीलाई पक्राउ गरिएको जिल्ला प्रहरी कार्यालय पर्साले जनाएको छ ।

जिल्ला प्रहरी कार्यालयबाट खटिएको प्रहरी टोलीले पक्राउ गरी पर्सा जिल्ला अदालतमा दाखिला गरिएको प्रहरी नायब उपरीक्षक चक्रबहादुर मल्लले जानकारी दिए ।

यसैगरी, प्रहरीले मोटरसाइकल चोरी कार्यमा सलंग्न एक जना व्यक्ति पक्राउ गरेको छ । वीरगञ्ज महानगरपालिका–२४ रामगढवा बस्ने कुमार कुशवाहाको नाममा दर्ता रहेको मधेस प्रदेश ०३–०३५ प ७१७५ नम्बरको २२० सिसीको रातो कालो रङ्गको पल्सर मोटरसाइकल बरामत गरिएको हो ।

वीरगञ्ज महानगरपालिका–१६ लिङ्करोडस्थित सडकखण्डको छेउमा पार्किङ गरी राखेको अवस्थामा लक तोडी डोर्याउँदै भाग्दै गरेको अवस्थामा राकेश चौधरीलाई प्रहरीले पक्राऊ गरेको हो ।

जिल्ला प्रहरी कार्यालय मातहतको वडा प्रहरी कार्यालय विर्ताबाट खटिएको प्रहरी टोलीले वीरगञ्ज महानगरपालिका–१६ लिङ्करोडबाट उक्त नम्बरको मोटरसाइकलसहित बारा जिल्ला निजगढ नगरपालिका–११ बस्ने वर्ष २७ को चौधरीलाई नियन्त्रणमा लिई थप अनुसन्धान कार्य भइरहेको बताइन्छ ।