नोरा फतेहीविरुद्ध ३ करोड क्षतिपुर्ती दावी गर्दै मानहानीकाे मुद्दा

एक उड्डयन कम्पनीले बलिउड अभिनेत्री नोरा फतेहीविरुद्ध ३ करोड रुपैयाँको मानहानिको मुद्दा दायर गरेको छ। कम्पनीले उनको ‘अपमानजनक र गैरजिम्मेवार’ टिप्पणीका कारण आफ्नो प्रतिष्ठामा आँच आएको दाबी गरेको छ।

ड्युन्स एभिएसनले गान्धीनगर अदालतमा यो मुद्दा दायर गरेको छ। कम्पनीका अनुसार, नोराले आफ्नो इन्स्टाग्राम खातामा चार्टर्ड विमानको भिडियो सेयर गर्दै त्यसलाई ‘सानो’, ‘खेलौना’ र ‘लेगो विमान’ भनेकी थिइन्। कम्पनीले नोराले सार्वजनिक रूपमा माफी माग्नुका साथै सामाजिक सञ्जालबाट उक्त उडानसँग सम्बन्धित सबै भनाइ तथा सामग्रीहरू हटाउन पनि आग्रह गरेको छ। वरिष्ठ सिभिल न्यायाधीश आर. अग्रवालको इजलासले यस विषयमा सेप्टेम्बर २५ मा सुनुवाइ गर्नेछ।

ड्युन्स एभिएसनद्वारा दायर गरिएको मुद्दाका अनुसार नोराले गत डिसेम्बरमा मुम्बई-जयपुर उडानका क्रममा विमानभित्र भिडियोहरू रेकर्ड गरेकी थिइन्। ती भिडियोहरूमा उनले उक्त विमानलाई ‘सानो’, ‘खेलौना’ र ‘लेगो विमान’ भनेर टिप्पणी गरेकी थिइन्। कम्पनीको दाबी छ कि ४ करोड ६० लाखभन्दा बढी फलोअर्स भएकी नोराले दिएका लापरवाहपूर्ण अभिव्यक्तिका कारण बुकिङहरू रद्द भएका छन्। यसले कम्पनीको व्यावसायिक सञ्चालनमा पनि नकारात्मक असर पारेको छ।

बुकिङमा २० प्रतिशत गिरावटको दाबी

कम्पनीले आफ्नो बुकिङमा १५ देखि २० प्रतिशतले कमी आएको र बुकिङ रद्द हुने क्रम बढेको दाबी गरेको छ। कम्पनीका अनुसार, नोराले यात्रा गरेको विमान उपयुक्त स्तर र आकारको थियो। ड्युन्स एभिएसनले उक्त विमान पूर्ण रूपमा DGCA-प्रमाणित र उडानयोग्य रहेको जनाएको छ। यसलाई वैध NSOP अन्तर्गत कानुनी रूपमा सञ्चालन गरिएको थियो।

३ करोड रुपैयाँ क्षतिपूर्ति र सार्वजनिक स्पष्टीकरणको माग

मुद्दामा कम्पनीले ३ करोड रुपैयाँ क्षतिपूर्ति माग गरेको छ। साथै, उसले सामाजिक सञ्जाल प्लेटफर्ममा राखेकाे सम्पूर्ण सामग्री तत्काल हटाउन निर्देशन दिन पनि अनुरोध गरेको छ।कम्पनीले नोरा फतेहीको तर्फबाट यस विषयमा सार्वजनिक स्पष्टीकरण जारी गर्नुपर्ने माग पनि गरेको छ। यस विषयमा नोराबाट कुनै स्पष्टीकरण आएको  छैन।

नोरा सँग जाेडिएका पुराना विवाद यस्ता छन् :

२०२६ – 'सार्के चुनर' गीतसम्बन्धी विवाद: यस गीतको शब्द अश्लील भएको भन्दै व्यापक आलोचना भएको थियो। नोराले हिन्दी संस्करणमा रहेका आपत्तिजनक शब्दहरूबारे आफूलाई जानकारी नभएको बताएकी थिइन्। उनले गीतका निर्माताहरूमाथि गीतलाई अनुपयुक्त ढंगले प्रस्तुत गरेको आरोप लगाएकी थिइन्। यस विवादका कारण महिला आयोगले नोरालाई बोलाएको थियो।

२०२२ – सुकेश चन्द्रशेखर प्रकरण: २०० करोड रुपैयाँको कथित मनी लान्ड्रिङ (अवैध सम्पत्ति शुद्धीकरण) प्रकरणमा ईडी (ED) ले नोरासँग सोधपुछ गरेको थियो; यसमा उनलाई अभियुक्त बनाइएको थिएन। सुकेशले यस्ताे पनि दावी गरेका थिए ;नोराले सम्बन्ध कायम राख्न आफूलाई बारम्बार फोन गर्ने गर्थिन्।'

२०२२ – ज्याकलिन फर्नान्डिजसँग मानहानिको विवाद: सुकेश प्रकरणमा आफ्नो नाम मुछिएको आरोप लगाउँदै नोराले ज्याकलिनविरुद्ध मानहानिको मुद्दा दायर गरिन्।

२०२२ – फिफा विश्वकपमा 'ट्राइकलर' (तिरंगा) सम्बन्धी विवाद: कतारमा एक प्रस्तुति दिने क्रममा भारतीय झण्डा उल्टो समातेपछि टेरेन्सले सामाजिक सञ्जालमा आलोचनाको सामना गर्नुपर्‍यो।

२०२० – टेरेन्स लुइस भिडियो विवाद: नृत्य अभ्यासको एउटा भिडियो भाइरल भएपछि नोरालाई अनुचित तरिकाले छोएको आरोप टेरेन्समाथि लाग्यो; पछि उक्त भिडियोसँग तोडमोड गरिएको खुलासा भयो।